Hebrews 9

Óoqeenáa amaana máqara faqa fu̱ka amaana máqa Yísunara qínoo máridanoo.

(Óoqai indaarú Ánutufa narí faqa maqásaaqaraasa faqa moodáanaki kíra ufa Mooseena sándufakí quqáqoofanoo márinoo maqee Yísunasaa fúka moodáanaki kíra ufa quqáqaifanoo máridanoo.)

1Indaarúqaa moodaanaki kíra ufa máru kamuqoo Ánutunara innaaruqíra sándufa óosana óosana márinau. Faiqí nísaukunnai áuqara úqiqaana maqa Ánutunara amooqímaria maaqafa faqa márinau. 2Mikamúqoo misá úqiqaana maqa usakáseeqa miná aundurái óosuseeqa, dínni óosirafa faiqí aanáiqikirausa kéeqeemaru maqáfa kooqí maqa náaquqara fee qiqau. Qóomauqa faqa Ánutuna uqafi̱qee maru feemu faqa minásaa quqéemaru qainda faqa minakí márinau. Dínni óosirafa fi̱qaramásee náaquqara maqa faiqí minakí sía kéeqee máriqau.

3Firaa qamunna mi-oosiránasaa ititánoo márinau. Miná dínni kooqí maqa márinau. Miná dínnatinai kukéeqaranaki fi̱raaqóo naaquqara óosirafa mi-atínai márinau. 4Kóora áuqimaru qáindafa minakí márinau. Minásaa ámiqundímaru ainainna suqée marufa márinau. Moodáanaki kíra bookisa minakí faqa márinau. Mifá kóora qannunnai ráfaaqafi̱rafa márinau. Mi-bookisánaki kóora áuqimaru qafeefa márinau. Mi-qafee auduránaki manna fee qímaru ainainafa innaarúnaindaraa feemu quqásoofanoo Isaraee máqannaasa aadána maqa maaqaki máridaqa náararoofaqa randásee néemaru feemufa márinau. Óoqai Aaroonafa faqa Isaraee máqannaasa faiqí fi̱raasá faqa nári sáunu úqiqaana maqaki quqásoofanoo Aaroona sáunusáa kai auqmára ururámafi̱noo misáindisaa sía ururanáu. Mi-saunúfa faqa moodáanaki kíra bookisaki quqásoofanoo márinau. Mooseefa Sinai áaqanasaa Ánutuna moodáanaki kíra ufa qaara oonisáa ákara rínau. Mi-akara rira ooniqandá faqa mi-bookisánaki faqa quqásoofanoo márinau. Mi-aiqama ainaináusa moodáanaki kíra bookisa moo áuqu Ánutufa nífauara bookisaki máriqau.

5Mi-bookisána áfusaa dínni dínni Ánutuna qangiroo nimanaqára máridanoo Ánutuna aréenarana koorooímaru qangirooqanda máriqau. Miqandá níqoosaqara dínni dínni mi-qaindána dínni dínni rafáaqafi̱noo márinau. Mi-qambaannásaa Ánutufa faiqí ánaasee mandáinainara nífaueenoo minníseenoo ímariqoo ititáidaqa. Dóo maqee sía mi-ainaináusara qianáura.

6Aanáiqikirausa maaqímasee óoqeenáa uqiqaana maqaki aináini maríqau. Aanáiqiki márusa kooqí maqaki faasaambáasaana kéeqafi̱ nári aináinimáriqau. 7Aanáiqikirausa úriqararafa fi̱raaqóo náaquqara maqa aunduráki áukuana áukuana moodáa karí kai mi-naaquqara maqánaki kéeqee márinau. Aiqáma aukuana áukuana miqíkaimma moodáa faasaana kái kéeqee marínau. Mifá aandáu fi̱díka mara máree minakí Ánutuna ámi marínau. Narí numóora faqa faiqí ánaasee numóora faqa miná ákiaqara mi-fi̱dikána ámi marínau. Mandáinaina sía irirai márainnana ákiaqara náruandoo qímasee miqí márinau.

8Maaqíra ainainaná kai Ánutuna náaquqara maraquna fannoo maasá moo úfa qímaqimidanoo. Minára maaqí qídanoo, kooqí maqa mifá máriannoo. Mée fi̱raaqóo náaquqara óosirannai sía miqóo faiqí fi̱mariaqoo sía miqóo aaná máridanoo fee qídanoo. 9Mi-kooqi maqáfa máa maqee mária kamuqoora kíkiqa úsidanoo, miná amanandá máridanoo, maaqímminoo máridanoo. Ánutuna ámi maría ainainafa faqa aandáu tatúfusee ámi maríafa faqa sía amana ámi marí fasiqana ámuqusa fi̱ndaukámasainanoo ánoonaikiannoo. 10Ánutuna ámi maría ainainna faqa aandáu tatúfusee ámi maríafa faqa mi-namúsa náranara faqa nammáriara faqa nammárinnai fi̱ndaukárana óosana óosana faqa qídaqa. Nipatasáaqaraa ainaina mi-ainaináfa úfaasu máridanoo. Ánutufa fúka ainaina quqáranara minára áfeesidanoo úfaasu máridanoo.

11Ásauku mundírafa dóo ani máridanoo. Innarúnai márira ainaina asumu faqa dóo ani máridanoo. Mi-amiqira ainaináusa aanáiqikirafa úriqararafa ásauku mundírafa dóo ani máridanoo. Mooseena aináinimarú uqiqaana maaqafa uréeqaradfa márinau, maqee ásauku mundírafa fúka fi̱raa anoona uqiqaana maqaki innarúnai aináini marífa úriqararafa ánoona uqanna ani máridanoo. Sía faiqí nísaukunnai áuqi maría amaana maqafa máridanoo sía maa-maqa maaqánasaaqaraa áinainau máridanoofau. 12Ásauku mundírafa innarúna kooqi maqaki óoru kéeqakufanoo fi̱raaqóo náaquqaranaki óoru kéeqafi̱noo sía mimmí fi̱díkafau burimakáu ánaaqi fi̱díkafau mandáinaina ákiaqara Ánutuna amisée kéeqanau. Narí kai narí fi̱díka qumáreenoo miqóo Ánutufa máruqoo maasára áranaqarafa taikáanifeera amiséenoo minánnai kai náaru asumu márirana maasá qímiannee qímasee máranau.

13Mooseena úqiqaana máqakinaa sandufara aandáu fi̱díkara maaqí qídanoo. Faiqí ánaasee mandáinaina máraasara ikairífaqaasee qímasee mimmí fi̱díka faqa burimakáu ákoona fi̱díka faqa ikairí faqaasa akunnímaqaidaqa mi-idánasaa dandá faqa misá nifaaqasása akusoofanoo Ánutufa misára ánukarausara foo qírausa máridammiafoo qídanoo.

14Fífau aandau fi̱díka fannoo rirímma faiqí ikairí fi̱ndáukaidanoo Ánutuna ásauku mundírana fi̱díkara náqi fee qianáuree. Mifá náaru náaru márira maraquna fannoo dadaaqifanóo narí uqanna ánoona tatúfi̱rana ámiranara foora Ánutuna áminau. Miná fi̱díka fannoo sía maasá ikairí kai fi̱ndaukáannoo. Maasá qimana maraquna faqa miná faqa fi̱ndaukáidanoo maasá mandóosana máree maríana faqa maasá kúqiranaki rarisáma quqée maríana faqa Yísuna fi̱díka fannoo miná faqa fi̱ndaukáidanoo. Miqí mándainaqa maasá amaná káqi márira Ánutuna aináinamminaura.

15Miqímandaifanoo ásauku mundírafa Ánutufa faqa faiqí faqa moodáanaki kíra ufa fúka ufa qíma andeéqeeqeenoo quqáidanoo. Ánutufa núqu ráinausa misá anirée máraaqeera. Náaru náaru afeedímari ámiqira qúmiasana sáqama áinainara kásooqaqee innaarúnai máraaqeera qídanoo. Indaarúqaa moodaanaki kíra aukuana sía amana mi-amiqira afeedíra qúmiasana saqamána máree máriqau. Misá mi-aukuanná káqi nári mandáinaina fannoo faiqí nifaaqa rumbánoo márinau. Maqee ásauku mundírana kúqirafá dóo mi-rumbárana nímirara idukínau.

16Faiqí moó fannoo afaaqóoqa qínafa faiqí mifá kúqinanoo miná afaaqóoqa qírafa ánoona kooroo íannoo. 17Mi-fasiqáfa káqi márinanoo mi-ufáfa káqi miqínoo máriannoo kúqinanoo kai koorooíannoo. 18Minára Mooseena moodáanaki kíra ufa fannoo aandáu kúqufanoo miqímandoofanoo dóo mi-ufána ánoona koorooináu.

19Mooseefa indaarúqaa moodáanaki kíra ufa miná sándufa óosana óosana faiqí ánaasee qímannimiseenoo burimakáu mimmí fi̱díka nammári námufaqa máreenoo náneeka amanee faqa taatuqée arira sipsip asausí faqa qumáreenoo fi̱díkaki raaraammá qumáreenoo sándufa búkamau faqa faiqí ánaasee nifaaqasása faqa akuséenoo maaqí qímasee qímanniminau. 20Maa-aandauná kúqina fi̱díka fannoo ínni faqa Ánutuna faqa moodáanaki kírana mapukú nímaqaidanoo, Ánutufa ínniara maa-moodaanaki kira ufamaú fuaqée qídanoo. 21Miqíkai ínoo Mooseefa úqiqaana maqa afaaqasása fi̱díka mi-aandau fi̱dikána ákinau. Akuséenoo máaqakina Ánutufi̱nnai innaaru qímaria ainainnasaa faqa aiqáma ákinau. 22Miqídanoo Mooseena sándufamau aandáu fi̱díkannai kai aiqáma ainaina ánukee márinau. Faiqí mandáinaina faqa fi̱díka téeqiranannai mi-manda ainainná ánukee márinau.

Ásauku mundírafa kúquna maasá mandáinaina maráqunnisánau.

23Úqiqaana maaqaki áuqeemaru ainainafa innaarúnai maru ainainna fooqáafa miná amanandá maqásaa márinau. Ánutufa minára kai iriséenoo qufaqa misá aandáu fi̱díkannai aiqáma ainaina ánukee máriqau. Ánoona ainaina innarúnai máru ánoona ainaina fi̱ndaukárana sía aandáu fi̱díka amaná máridanoo, moo úriqarara ainaina marasée árirafa kai amaná máridanoo. Ásauku mundírana árirafa mifá kai amaná máriannoo.

24Ásauku mundírafa úqiqaana maqa faiqí nísaukunnai áuqamáqoonaki innaarúnai márina fooqáanaki miqíranaki sía kéeqanau, mi-maqánaki náaquqara oósiranaki sía kéeqanau. Mifá andeeqásee innaarúna máqa maaqaki Ánutufa máruqoo uqanna kéeqafi̱noo kooroomáfi̱noo máridanoo maasá dadaaqídanoo.

25Yuda máqanna aanáiqikirausa misá úriqararafa aandáu fi̱díka mara máreenoo náaquqara óosiranaki kéeqee marínau, áukuana áukuana kéeqee marínau. Ásauku mundírafa sía moómoo kari narí afaaqa Ánutuna aru áminau. 26Miqíqa moómoo kari árifanoofau maqa máaqa óosana ároonakiqari aupúraida márini. Óoqeenáa áukuana taikárara adeedírama fufanóo maqee áukuana kai ásauku mundírafa moodáa karí kai kooroo máfi̱noo narí afaaqa Ánutuna aru amiséenoo minánnai maasá mandáinaina rukánnisanau. 27Aiqámausa moodáa kari kúquannana amana kái Yísufa moodáa karí kúqinau, aiqámausa moodáa karí kai kuqufi̱qa miqóoqari Ánutuna faqa ufa qíranaki fi̱fáranoo. 28Yísufa mi-maú kai fi̱noo moómoosa numóo maráqunnisaanífeera narí afaaqa tatúfi̱rafara foora moodáannai Ánutuna aru áminau. Mifá kafáa koorooíannoo. Sía kafáa numóo úndarau qúmuannoofau. Narí áfeesara máriasara qumurée maréeqee asumu máriranaki quqánnisarara qúmuannoo.